ధాన్యం కొనుగోలులో రైస్ మిల్లర్లు సహకరించాలి – కలెక్టర్ ఇలా త్రిపాఠి వట్టిమర్తి రైస్ మిల్లును ఆకస్మికంగా తనిఖీ

నల్గొండ బ్యూరో, డైనమిక్ ,నవంబర్ 6

ఈ వానాకాలంలో పండించిన ధాన్యం కొనుగోలులో రైస్ మిల్లర్లు పూర్తి స్థాయిలో సహకరించాలని జిల్లా కలెక్టర్ ఇలా త్రిపాఠి సూచించారు. గురువారం ఆమె చిట్యాల మండలం వట్టిమర్తి గ్రామంలో ఉన్న సిద్ధార్థ రైస్ మిల్లును ఆకస్మికంగా తనిఖీ చేశారు.

ధాన్యం రవాణా, నాణ్యతపై సమీక్ష

కొనుగోలు కేంద్రాల నుండి రైస్ మిల్లుకు వచ్చిన ధాన్యం వివరాలను కలెక్టర్ పరిశీలించారు. ఇప్పటివరకు ఎన్ని లారీలు వచ్చాయో, ధాన్యంలో తేమ శాతం, నాణ్యత ప్రమాణాలపై యాజమాన్యాన్ని ప్రశ్నించారు.

వర్షాల విరామంతో మిల్లులకు ధాన్యం రాక ప్రారంభం

కలెక్టర్ తెలిపారు — “గత వారం రోజులుగా వర్షాల కారణంగా రైస్ మిల్లులకు ధాన్యం రాక నిలిచిపోయింది. ఇప్పుడు వర్షాలు తగ్గడంతో రైతులు ధాన్యం తరలించడం ప్రారంభించారు. వచ్చిన వెంటనే దానిని ఆన్‌లోడ్ చేసుకునేలా మిల్లర్లు ఏర్పాట్లు చేసుకోవాలి,” అన్నారు.

సమయానుసారంగా ఆన్‌లోడ్ చేయాలని సూచన

ధాన్యం నిల్వలో ఆలస్యం చేయకుండా తక్షణమే మిల్లులలో దించుకోవాలని ఆమె సూచించారు. “ఒకవేళ మళ్లీ వర్షం వస్తే ధాన్యం తడిసిపోయే ప్రమాదం ఉంది. అందుకే స్థలం, హమాలీలు ముందుగానే సిద్ధంగా ఉంచుకోవాలి,” అని కలెక్టర్ సూచించారు.

అధికారుల సమక్షంలో తనిఖీ

ఈ తనిఖీలో రెవెన్యూ అదనపు కలెక్టర్ జే. శ్రీనివాస్, జిల్లా పౌర సరఫరాల అధికారి వెంకటేష్, పౌర సరఫరాల జిల్లా మేనేజర్ గోపికృష్ణ, జిల్లా సహకార అధికారి పత్యా నాయక్ తదితరులు పాల్గొన్నారు.