ఓటు హక్కు వినియోగించుకోవాలి – జిల్లా కలెక్టర్ తేజస్ నంద్ లాల్ పవార్

సూర్యాపేట బ్యూరో, డైనమిక్ న్యూస్ డిసెంబర్ 14,

గ్రామపంచాయతీ ఎన్నికల్లో ప్రతి ఒక్కరూ తప్పనిసరిగా ఓటు హక్కు వినియోగించుకోవాలని జిల్లా కలెక్టర్ తేజస్ నంద్ లాల్ పవార్ పిలుపునిచ్చారు. కౌంటింగ్ ప్రక్రియ మధ్యాహ్నం 2.00 గంటల నుంచి ప్రారంభించాలని, ప్రతి కౌంటింగ్ కేంద్రంలో రెండు టేబుల్స్ ఏర్పాటు చేయాలని ఆయన ఎన్నికల సిబ్బందికి ఆదేశించారు.

కౌంటింగ్‌పై కఠిన నిబంధనలు

కౌంటింగ్ ప్రక్రియ మొత్తం వీడియోగ్రఫీ చేయాలని, కౌంటింగ్ కేంద్రాల్లోకి సెల్‌ఫోన్లకు అనుమతి ఇవ్వకూడదని స్పష్టంగా ఆదేశించారు. ఎన్నికల నిర్వహణలో ఎలాంటి లోపాలు తలెత్తకుండా అధికారులు అప్రమత్తంగా వ్యవహరించాలని సూచించారు.

పోలింగ్ కేంద్రాల తనిఖీ

ఆదివారం మునగాల మండల కేంద్రంలోని జిల్లా పరిషత్ ఉన్నత పాఠశాలలో, కలకోవా ప్రాథమిక పాఠశాలలో ఏర్పాటు చేసిన పోలింగ్ కేంద్రాలను జిల్లా కలెక్టర్ సందర్శించి పోలింగ్ సరళిని పరిశీలించారు. పోలింగ్ ప్రక్రియను సజావుగా నిర్వహిస్తున్న అధికారులను అభినందించారు.

పోలింగ్ శాతం వివరాలు

మునగాల గ్రామపంచాయతీలోని 14 వార్డుల్లో మొత్తం 5,338 ఓట్లు ఉండగా, ఉదయం 11.15 గంటల వరకు 63 శాతం పోలింగ్ పూర్తయిందని అధికారులు తెలిపారు. అలాగే కలకోవా గ్రామపంచాయతీలో 10 వార్డుల్లో 2,112 ఓట్లు ఉండగా, ఉదయం 11.00 గంటల నాటికి 60 శాతం పోలింగ్ పూర్తయిందని వెల్లడించారు.

అధికారుల వివరణ

ఈ వివరాలను రిటర్నింగ్ అధికారులు అమృతరెడ్డి, శోభన్ బాబు జిల్లా కలెక్టర్‌కు వివరించారు.