నేరేడుచర్ల మున్సిపాలిటీలో కాంగ్రెస్ ఆధిక్యంచైర్మన్ ఎన్నికపై ఉత్కంఠ – బీఆర్‌ఎస్-జనసేనకు 6 సీట్లు

నేరేడుచర్ల, డైనమిక్ న్యూస్,ఫిబ్రవరి 13

నేరేడుచర్ల మున్సిపాలిటీ ఎన్నికల్లో కాంగ్రెస్ పార్టీ స్పష్టమైన ఆధిక్యం సాధించింది. మొత్తం 15 వార్డులలో కాంగ్రెస్ 9 స్థానాలు గెలుచుకుని మెజార్టీ దక్కించుకోగా, బీఆర్‌ఎస్ పార్టీ 5 వార్డుల్లో విజయం సాధించింది. జనసేన పార్టీతో పొత్తులో మరో ఒక వార్డు గెలవడంతో బీఆర్‌ఎస్–జనసేన కూటమి మొత్తం 6 స్థానాలను కైవసం చేసుకుంది.

త్రిముఖ పోటీ – చివరికి ద్విముఖ సమరం

ఈ ఎన్నికల్లో బీఆర్‌ఎస్, కాంగ్రెస్, బీజేపీ పార్టీల మధ్య త్రిముఖ పోటీ నెలకొన్నప్పటికీ, ప్రధాన పోటీ మాత్రం కాంగ్రెస్ మరియు బీఆర్‌ఎస్ మధ్యే సాగింది. బీజేపీ పార్టీ ఒక్క వార్డులో కూడా విజయం సాధించలేకపోవడం విశేషం.

చైర్మన్ పదవిపై కాంగ్రెస్ పట్టు

9 మంది సభ్యులతో కాంగ్రెస్ పార్టీకి స్పష్టమైన మెజార్టీ లభించడంతో చైర్మన్ పదవి దాదాపు ఖరారైనట్లే కనిపిస్తోంది. అయితే బీఆర్‌ఎస్–జనసేన కూటమి కూడా వ్యూహాత్మకంగా ముందుకు సాగుతున్న నేపథ్యంలో రాజకీయంగా కొంత ఉత్కంఠ నెలకొంది.

ప్రత్యేక సమావేశానికి నోటీసు

చైర్మన్, వైస్ చైర్మన్ ఎన్నికల కోసం మున్సిపల్ కార్యాలయం ప్రత్యేక సమావేశానికి నోటీసు జారీ చేసింది. ఎన్నికైన సభ్యుల సమక్షంలో అధికారికంగా ఎన్నిక ప్రక్రియ నిర్వహించనున్నారు.మొత్తంగా నేరేడుచర్ల మున్సిపాలిటీలో కాంగ్రెస్ పార్టీ ఆధిపత్యం చాటుకోగా, బీజేపీ ఖాతా తెరవలేకపోవడం రాజకీయంగా చర్చనీయాంశంగా మారింది.