కల్తీ కాలనాగు – ప్రకృతి మాత కడుపులో పెరుగుతున్న ప్రమాదం

– రచన: మంజుల పత్తిపాటి, మాజీ ఆలేరు వ్యవసాయ మార్కెట్ కమిటీ డైరెక్టర్, యాదాద్రి భువనగిరి జిల్లా

మనిషి అభివృద్ధి కోసం అడుగులు వేస్తూ ప్రకృతిని నెమ్మదిగా కాలనాగు చెంతకి నెట్టేస్తున్నాడా? ఈ ప్రశ్న ఈ కాలానికి ప్రతిధ్వనిలా మారింది. కల్తీ మందులు, రసాయన ఎరువులు, ప్లాస్టిక్ వాడకం – ఇవన్నీ మనం రోజువారీ జీవన భాగంగా మార్చుకున్నాం. కానీ అదే మన పంటలలో, మన ఆహారంలో, చివరికి మన రక్తంలోనూ కలిసిపోయి “కల్తీ కాలనాగు”గా రూపం దిద్దుకుంటోందని ఈ రచన ఆవేదనతో చెబుతోంది.

కల్తీ పంటలతో పెరుగుతున్న కల్తీ కాలం

రైతు తన భూమిలో పంటలు పండిస్తున్నాడే కానీ, ఆ పంటలు సహజసిద్ధమైనవి కావు. కల్తీ మందులు, కల్తీ రసాయన ఎరువులతో పండిన ఆహారం… మన ఆరోగ్యానికి కంచు బాణంలా మారుతోంది. మనమే మన ఆహారంలో విషం కలుపుతున్నామన్న నిజం మన దృష్టికి రావడం లేదు.

ప్రకృతి మాత వేదన – అరణ్యాల అరుపు

అరణ్యాలు తరిగిపోతున్నాయి. పచ్చదనం నశిస్తోంది. ప్రకృతి మాత తన పచ్చకోకను కోల్పోయి నిశ్శబ్దంగా రోదిస్తోంది. గాలిపటంలా తెగిపోయిన మన ఆనందం – వాస్తవానికి ప్రకృతి నాశనం చేసిన మూల్యం.

ప్లాస్టిక్ కాటు – కాలుష్య కాలనాగు

ప్లాస్టిక్‌ను మనం వాడి విసరడం సులభం. కానీ అది తిరిగి ప్రకృతి మాత కడుపులోకి చేరి శ్వాసను ఆపేస్తోంది. నేల, నీరు, గాలి అన్నీ కలుషితమవుతున్నాయి. మనం పడగ విప్పిన “కాలుష్య కాలనాగు” కింద జీవిస్తున్నామన్న విషయం మనకు తెలియనట్టు నటిస్తున్నాం.

అన్నం పరబ్రహ్మం మరచిన మనిషి

అన్నం పరబ్రహ్మ స్వరూపం అని మన పెద్దలు చెప్పిన మాటలను మరచిపోయాం. ఈ రోజుల్లో విందులు, వినోదాలు పేరుతో ఆహారం వృథా చేస్తున్నాం. కానీ అదే సమయంలో వీధి చివర చెత్త డబ్బాల దగ్గర ఆకలితో అలమటిస్తున్న అనాధలను చూడనట్టే ఉన్నాం. ఇది మన సమాజానికి, మన మనసుకు ఒక నిశ్శబ్ద ప్రశ్న.

ప్రకృతిని కాపాడాలని మంజుల పత్తిపాటి  పిలుపు –

“ప్రకృతి మన ఇంటి రేపటి దీపాలను ఆర్పేయకముందే
ప్లాస్టిక్ వాడకాన్ని, కల్తీ రసాయన ఎరువులను పూర్తిగా మానేసి,
చెట్లను నాటుదాం. ప్రకృతిని కాపాడుదాం.”
ప్రకృతి మాతపై మన బాధ్యతను గుర్తు చేసే ఈ భావోద్వేగ పిలుపు, కాలుష్యం మధ్యలో మనసును తాకే స్వరం. అభివృద్ధి పయనంలో ప్రకృతి సంరక్షణను మరవకూడదని “కల్తీ కాలనాగు” మనకు హెచ్చరిస్తోంది.