నిజాయతీగా ఉండటమే కాదు… అవినీతిని అడ్డుకోవాలి..! బి. వెంకన్న, చీఫ్ విజిలెన్స్ ఆఫీసర్

సింగరేణి విజిలెన్స్ అవగాహన వారోత్సవాల ప్రారంభం

హైదరాబాద్, డైనమిక్ డెస్క్, అక్టోబర్ 27

సింగరేణి విజిలెన్స్ అవగాహన వారోత్సవాల కార్యక్రమంలో భాగంగా సింగరేణి ఎగ్జిక్యూటివ్ డైరెక్టర్ (కోల్ మూవ్‌మెంట్), చీఫ్ విజిలెన్స్ ఆఫీసర్ బి. వెంకన్న మాట్లాడుతూ “నిజాయతీగా ఉండటమే కాదు, అవినీతిని అడ్డుకోవాలి” అని పిలుపునిచ్చారు.

అవినీతి ఎదుర్కోవటం ప్రతీ పౌరుడి బాధ్యత

సోమవారం హైదరాబాద్‌లోని సింగరేణి భవన్‌లో జరిగిన కార్యక్రమంలో ఆయన మాట్లాడుతూ దేశ అభివృద్ధికి అవినీతి ఒక పెద్ద అవరోధమని తెలిపారు. దీనిని ఎదుర్కోవడం ప్రతీ పౌరుడి బాధ్యత అని, విజిలెన్స్ అనేది ఒక సమిష్టి బాధ్యతగా ప్రతీ ఒక్కరూ భావించాలన్నారు.

సింగరేణి సంస్థలో పారదర్శకత అవసరం

సింగరేణి సంస్థలోని అన్ని విభాగాలు పారదర్శకంగా, అవినీతి రహితంగా ముందుకు సాగాలని ఆయన సూచించారు. ఏదైనా అక్రమం, అవినీతి లేదా ఆస్తుల అన్యాక్రాంతం వంటి అంశాలు గమనించినప్పుడు వాటిని వెంటనే విజిలెన్స్ శాఖకు ఫిర్యాదు చేయాలని సూచించారు.

సమాచారం గోప్యత భరోసా

అక్రమాలను అరికట్టడంలో కార్మికులు, ఉద్యోగులు, అధికారులు తమ వంతుగా సహకరించాలని బి. వెంకన్న పిలుపునిచ్చారు. విజిలెన్స్ శాఖకు ఇచ్చే సమాచారాన్ని పూర్తిగా గోప్యంగా ఉంచుతామని హామీ ఇచ్చారు.

అవినీతిరహిత భారత్ సాధ్యమే

ప్రతీ ఒక్కరూ జాగరూకతతో వ్యవహరిస్తే అవినీతిరహిత భారతావని సాధ్యమవుతుందని, భారతదేశం అభివృద్ధి చెందిన దేశంగా మారాలన్న లక్ష్యాన్ని చేరుకోవడంలో ఇది కీలకమని తెలిపారు.

పౌరుల సత్య నిష్ట ప్రతిజ్ఞ

విజిలెన్స్ అవగాహన వారోత్సవాల ప్రారంభ కార్యక్రమంలో భాగంగా ముందుగా సింగరేణి ఉద్యోగులు, అధికారులు కలిసి పౌరుల సత్య నిష్ట ప్రతిజ్ఞను సేకరించారు.

పాల్గొన్న అధికారులు

ఈ కార్యక్రమంలో జనరల్ మేనేజర్ (కోఆర్డినేషన్ మరియు మార్కెటింగ్) తాడబోయిన శ్రీనివాస్, జీఎం (ఈ అండ్ ఎం) విశ్వనాథ రాజు, జీఎం (సివిల్) వెంకటేశ్వర్లు తదితరులు పాల్గొన్నారు.