బాధితుడి వద్దకే వెళ్లి ఫిర్యాదు నమోదుCitizen / Victim Centric Policingకు నిదర్శనంగా కనగల్ పోలీసులు

నల్లగొండ బ్యూరో, డైనమిక్ న్యూస్,జనవరి 22

బాధితులు స్వయంగా పోలీస్ స్టేషన్‌కు వచ్చి ఫిర్యాదు చేయలేని ప్రత్యేక పరిస్థితుల్లో, వారి వద్దకే వెళ్లి న్యాయం అందించే తెలంగాణ పోలీస్ శాఖ Citizen / Victim Centric Policing విధానానికి కనగల్ పోలీసులు మరోసారి సార్థకత చాటారు.

ఆసుపత్రిలో చికిత్స పొందుతున్న బాధితుడు

నల్లగొండ జిల్లా కనగల్ పోలీస్ స్టేషన్ పరిధిలోని మదనపురం గ్రామానికి చెందిన బొల్లిగొర్ల గురువయ్య ఇటీవల జరిగిన దాడిలో తీవ్రంగా గాయపడి, నల్లగొండలోని సంరక్ష ఆసుపత్రిలో చికిత్స పొందుతున్న విషయం పోలీసు అధికారుల దృష్టికి వచ్చింది.

ఎస్పీ ఆదేశాలతో తక్షణ స్పందన

ఈ ఘటనపై జిల్లా ఎస్పీ శరత్ చంద్ర పవార్ ఐపీఎస్ వెంటనే స్పందించి కనగల్ ఎస్‌ఐతో మాట్లాడారు. ఆయన ఆదేశాల మేరకు కనగల్ పోలీసు అధికారులు ఆలస్యం చేయకుండా ఆసుపత్రికి చేరుకుని బాధితుడిని కలిశారు.

స్పాట్‌లోనే వాంగ్మూలం, FIR నమోదు

గాయాల కారణంగా బాధితుడు పోలీస్ స్టేషన్‌కు వచ్చి ఫిర్యాదు ఇవ్వలేని పరిస్థితి ఉండటంతో, పోలీసులు ఆసుపత్రిలోనే బాధితుడి వాంగ్మూలాన్ని నమోదు చేశారు. జరిగిన అన్యాయాన్ని వివరంగా తెలుసుకొని, అక్కడికక్కడే FIR నమోదు చేసి కేసుపై దర్యాప్తు ప్రారంభించారు. నిందితుడిపై చట్టప్రకారం కఠిన చర్యలు తీసుకునేందుకు చర్యలు చేపట్టారు.

బాధిత కేంద్రిత పోలీసింగ్‌దే మా లక్ష్యం: ఎస్పీ

ఈ సందర్భంగా జిల్లా ఎస్పీ శరత్ చంద్ర పవార్ ఐపీఎస్ మాట్లాడుతూ, అత్యవసర పరిస్థితుల్లో న్యాయం కోసం బాధితులు తప్పనిసరిగా పోలీస్ స్టేషన్‌కు రావాల్సిన అవసరం లేదని తెలిపారు. అవసరమైతే పోలీసులే బాధితుల వద్దకు వెళ్లి ఫిర్యాదు స్వీకరిస్తారని స్పష్టం చేశారు.గాయపడిన వారు, ఆసుపత్రుల్లో చికిత్స పొందుతున్న వారు, వృద్ధులు, మహిళలు, అసహాయ వర్గాలకు Victim Centric Policing ద్వారా తక్షణ న్యాయం అందించడమే తెలంగాణ పోలీస్ శాఖ లక్ష్యమని ఆయన పేర్కొన్నారు.

భయపడకుండా పోలీసులను సంప్రదించాలి

నల్లగొండ జిల్లా పోలీస్ శాఖ ప్రజల భద్రత, రక్షణ, న్యాయం కోసం ఎల్లప్పుడూ కట్టుబడి ఉంటుందని అధికారులు తెలిపారు. ఎవరైనా అన్యాయానికి గురైతే భయపడకుండా వెంటనే పోలీసులకు సమాచారం ఇవ్వాలని కోరారు.