నల్లగొండలో రూ.75 కోట్లతో రహదారుల అభివృద్ధి పనులు రెండు ప్రధాన రహదారుల విస్తరణ, బలోపేతానికి శంకుస్థాపన చేసిన మంత్రి కోమటిరెడ్డి వెంకట్ రెడ్డి

శుభోదయ డైనమిక్ న్యూస్ – నల్లగొండ బ్యూరో, అక్టోబర్ 11

నల్లగొండ నియోజకవర్గంలో రహదారుల అభివృద్ధికి రాష్ట్ర ప్రభుత్వం ప్రాధాన్యతనిస్తోందని రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్ రెడ్డి పేర్కొన్నారు. కనగల్ మండల పరిధిలో రెండు ప్రధాన రహదారుల విస్తరణ, బలోపేతం పనులకు మొత్తం రూ.75 కోట్ల అంచనా వ్యయంతో ఆయన శంకుస్థాపన చేశారు.

రూ.41 కోట్లతో రహదారి అభివృద్ధి

కనగల్ మండలం తేలకంటిగూడెం మీదుగా తోరగల్ నుంచి నల్లగొండ మండలం ముషంపల్లి వరకు రూ.41 కోట్ల అంచనా వ్యయంతో చేపట్టనున్న రహదారి విస్తరణ, బలోపేతం పనులకు మంత్రి శంకుస్థాపన చేశారు.

రూ.34 కోట్లతో మరో రహదారి

కనగల్ మండలం చేరిగూడెం స్టేజీ నుంచి చెట్ల చెన్నారం, చిన్నమాదారం, తంగెళ్లవారిగూడెం వరకు రూ.34 కోట్ల అంచనా వ్యయంతో చేపట్టనున్న రహదారి విస్తరణ, బలోపేతం పనులకు కూడా మంత్రి శంకుస్థాపన చేశారు. ఈ సందర్భంగా ఏర్పాటు చేసిన కార్యక్రమంలో పాల్గొని మాట్లాడారు.

మంత్రి కోమటిరెడ్డికి ఘన స్వాగతం

అంతకుముందు మంత్రి ద్విచక్ర వాహనంపై శేరిలింగోటం ఎక్స్ రోడ్డు వద్దకు చేరుకోగా కాంగ్రెస్ పార్టీ నాయకులు, కార్యకర్తలు భారీ ర్యాలీతో ఘనస్వాగతం పలికారు.

ప్రజల నుంచి వినతుల స్వీకరణ

నల్లగొండ పట్టణంలోని క్లాక్ టవర్ సెంటర్‌లో ఉన్న ఇందిరా భవన్ క్యాంపు కార్యాలయంలో మంత్రి కోమటిరెడ్డి వెంకట్ రెడ్డి ప్రజల నుంచి వివిధ సమస్యలపై వినతిపత్రాలు స్వీకరించారు. సమస్యల పరిష్కారం కోరుతూ వచ్చిన ప్రజల విజ్ఞప్తులను పరిశీలించారు.

మార్కెట్ కమిటీ పాలకవర్గానికి అభినందనలు

నల్లగొండ మార్కెట్ కమిటీ నూతన చైర్మన్‌గా నియమితులైన ముషంపల్లి గ్రామానికి చెందిన బైరెడ్డి హేమలత వెంకట్ రెడ్డితో పాటు పలువురు పాలకవర్గ సభ్యులను మంత్రి తన క్యాంపు కార్యాలయంలో సన్మానించి అభినందించారు.